O 24 de Febreiro os membros do proxecto Reciclamos separando e algúns alumnos do IES Pedra da Aguia fomos a Sogama, unha das principais plantas de xestión e tratamento dos residuos urbanos de Galiza. Ao chegar á planta e baixar do bus, percibimos un olor moi forte procedente dos tratamentos e a cantidade de lixo de Sogama. O que máis destacaba da planta eran as tres chimeneas, dúas medianas polas que saía unha grande cantidade de vapor da auga (que utilizaban para secar o lixo) e outra moi grande de cemento pola que saía un pouco fume (para queimar os residuos que non servían), tamén vimos un acceso á planta para o tren que traía o lixo. Ao entrar, fomos directos a un edificio de oficinas logo de pasar polo control da entrada. Neste edificio estivemos vendo unha maqueta de toda a planta e déronnos unha charla sobre o funcionamento de Sogama, fixéronnos unhas preguntas sobre o que reciclábamos na casa e ao rematar, preparáronnos para ir ás instalacións de tratamento do lixo e puxéronnos un chaleco reflectante, unha mascarilla e un casco.
Ao chegar ás propias instalacións de reciclaxe, dividíronnos en dous grupos.
- Primeiro fomos ao lugar onde descargaban os camións do lixo.
- Ao acabar fomos ao recinto de carga e descarga do lixo, no que estaba un camión cargando o lixo.
- Despois ao entrar nunha das naves, fomos a unhas habitacións dentro da propia nave nas que un grupo de operadoras estaban separando os distintos envases de plástico en diversos túneles.
- Logo fomos aos "foxos", que consistían nun espazo xigante onde depositaban o lixo que xa non servía para reciclar, alí era onde o tren descargaba os residuos que traía. Era o lugar onde máis"cheiraba" de todos. Despois volvemos ao bus e demos un "tour" polas instalacións que nos quedaban:
- En primeiro lugar, mostráronnos como pesan os camións que chegan das distintas ecoplantas, procedentes dos diferentes concellos, para saber a cantidade de residuos que achegan en cada caso.
- Vimos que as escouras remanentes as levan a unha explanada ao lado da planta onde se van acumulando.
- Fomos a outra explanada situada ao lado da mencionada anteriormente na que había bolsas das cinzas resultantes da queima de residuos, que estaban envoltas nun plástico e que as ían cubrindo con terra.
- Tamén nos ensinaron unha "piscina" na que estaban os líquidos producidos pola fábrica.
- Logo vimos a xingantesca cheminea de cemento pola que saían os fumes que producía a planta ao queimar o lixo.
- Despois fomos a unha pequena central de electricidade dentro de Sogama que producía corrente eléctrica a partir dos residuos.
- Finalmente volvemos a oficina onde nos deron uns agasallos, e quitámonos a roupa de protección.
